Restos Arqueolóxicos en Vilar e Saxamonde

 

 

Miliario de Antas Foto: J. Migueles

Como xa tratamos no apartado adicado aos miliarios no límite de Vilar de Infesta con Guizán (Mos) atópase o único miliario que se conserva in situ en toda a provincia de Pontevedra. Está cheo de cruces e cazoletas gravadas na idade Media e/ou Moderna, o que nos impide saber o que porían as inscricións romanas. Ligado ás crenzas sobre fertilidade, as mulleres cando non conseguían quedar embarazadas acudían a fregarse contra a pedra.

É coñecido como miliario de Antas, pero tamén como miliario de Anta de Maniola, nome erroneamente dado xa que anta significa mámoa. A verdadeira Anta de Maniola é unha gran mámoa que se atopa moi preto, entre os campos de fútbol de Guizán e Vilar. O seu estado de conservación é bastante malo porque o muro de peche do campo de Guizán cortou parte da base e ademais a mámoa é atravesada por un sendeiro empregado por motos, bicicletas e xente a pé ou a cabalo (2020).

 

Anta de Maniola. Fotos. J. Migueles

Se seguimos por Chan das Pipas, adentrándonos na parroquia de Saxamonde, atoparemos tres mámoas máis nas proximidades do centro cultural. Unha cuarta mámoa sería destruída durante a construción de dito centro. Ademais no entorno da área recreativa atopáronse restos que indicarían que alí houbo un asentamento.

Mámoa preto do CentroCultural. Foto: J. Migueles

 

Un pouco máis lonxe atópase o lugar do Casal, onde o achado de tégulas (tellas) indícanos a existencia dun asentamento romano. Ao estar entre o miliario de Anta de Maniola e outro descuberto no lugar de Padrón (Saxamonde) e que se conserva no Museo de Pontevedra, este asentamento atoparíase na vía romana Per-loca-marítima. ¿Será a Búrbida da que os investigadores non dan chegado a un consenso da súa localización?

O Casal. Asentamento Romano. Foto: J. Migueles

 

Seguindo o percorrido do camiño de Santiago chegaremos ao Chan da Grila, onde atoparemos unha nova mámoa na beira dereita.

Mámoa de Chan da Grila. Foto: J. Migueles

 

Texto: J. Migueles

BIBLIOGRAFÍA

Visitas guiadas de A Citania S. L.-Arqueólogo Xurxo Constela.

Anta de Maniola. Publicado por Albo en Celtiberia.net