Festivais Teatrais e Cinematográficos

Artistas na rúa

Certame organizado na Alameda dende o ano 2000 pola iniciativa de Luis Crespo. Conta coa actuación de magos, pallasos, músicos, malabaristas e equilibristas. Festival que tivo altos e baixos incluído en varias ocasións na programación das Festas da Cooca. A partires do 2016 celébrase complementando á Shopping Night, noite no que o comercio local oferta promocións e descontos.

Ciclo de Teatro Afeccionado

Vénse celebrando no Multiusos do Piñeral do Crego, en Chapela, dende o 2012.

Lareta -Humor na súa tinta

Lareta é un festival de monólogos en galego que dende o 2013 vén organizando o Servizo de Normalización Lingüística, tendo actuado recoñecidos monologuistas como Quico Cadaval ou Víctor Fábregas. No 2017 pasou a chamarse Humor na súa tinta.

Festival de Curtrametraxes e Diversidade Funcional Andaina

Nado no 2013 dentro da programación do Redondela en Curto. Festival organizado pola Asociación Andaina de Persoas con Necesidades Especiais co dobre obxectivo de naturalizar e dar visibilidade á discapacidade a través do audiovisual.

Festival internacional de títeres de Redondela (Memorial Juanjo Amoedo)

No ano 2000 celebrouse a primeira edición e dende aquela non parou de crecer a asistencia de público. Neste certame teñen participado grupos de puntos tan dispares coma Australia, India ou Arxentina.

Redondela en Curto

Festival internacional de curtametraxes organizado por Fernando Carreira "Cuchi" dende o 2005. A proxección divídese en bloques, elixíndose ao gañador co voto do público. Conta ademais cun bloque alternativo chamado Sección Friki ou Sesión Golfa. Á sombra deste festival naceu o Festival de Curtametraxes Andaina.

O festival suspendeuse no 2019 por desacordos co Concello e despois do peche de Redondela Tv, proxecto da mesma persoa. Fernando Carreira marcharía daquela a Soutomaior creando Soutomaior Tv e o Festival Souto Pequeno. Co troco do goberno , no 2020 retómanse unhas negociacións para volver a organizar o festival que fracasan polo que Fernando da por finalizada a traxectoria deste festival.

Outono Teatro

Programación teatral do Concello que nos derradeiros anos oferta obras de diferentes compañías galegas.

Teatrarte

Festival de teatro afeccionado organizado polo Concello e que sería suspendido no 2012 por mor dos recortes.

Teatro Cativo

Programación teatral do Concello dirixida ao público infantil.

Autor: Juan Migueles