As estacións de ferrocarril e de tranvía.

 

Estación de Redondela entre 1927 e 1936. Foto: António Passaporte. Arquivo Loty-IPCE

Estación de ferrocarril de Redondela

A primeira estación estaba situada nas inmediacións do viaduto vello e foi construída en 1881, ano no que se iniciaron as obras do tramo Redondela-Pontevedra. Desta vella estación aínda se conserva algunha edificación e o depósito da auga para as máquinas de vapor. Esta auga recollíase directamente do río Alvedosa e un motor situado na actual rúa Ernestina Otero propulsaba a auga ata o depósito.

Estación de Redondela. Diplomático alemán, 1930. todocoleccion.net

 

En 1903 denunciábase o abandono da estación, en 1900 o xefe despedira aos mozos, polo que os pasaxeiros tiñan que realizar o transbordo da equipaxe, ademais as plataformas non estaban cubertos. Outras reclamacións que chegarían ao congreso serían a necesidade de crear unha dobre vía na estación e o perigo de derrube do túnel dos Valos, se ben era certo, que se solucionaran os problemas de asolagamentos ao desviarse o río que pasaba por riba.

Habería que agardar a febreiro de 1910, para que deran inicio os traballos para cubrir unha das plataformas, grazas ás xestións realizadas polo deputado a cortes Francisco de Federico.

En maio de 1914 comeza a construírse unha nova plataforma para os trens procedentes de Pontevedra e Portugal.

En 1922 comezan a realizarse unha serie de melloras: construción dun depósito para unha locomotora de reserva, ampliación do edificio para viaxeiros e do restaurante e a dotación dun almacén para mercadorías. 

Túnel da Portela que conducía á antiga estación, 2020. Foto: J. Migueles

 A construción dun trazado alternativo na liña Vigo-Ourense provocan a construción da nova estación, inaugurada o 16 de maio de 1971, e o posterior abandono do Viaduto de Monforte.

Estación de ferrocarril de Chapela.

En canto á estación de Chapela foi inaugurada en 1922. A finais de 1950 a dirección xeral de Renfe decide habilitala para realizar facturacións e recibir mercadorías. Con anterioridade a esta data os veciños de Chapela tiñan que desprazarse ata Vigo ou Redondela para coller o tren.

Estación Chapela. Chapela de onte a hoxe. Gonzalo Mencía Castro.

Estación de tranvía de Chapela.

O 13 do 1 de 1912 constitúese a compañía Tranvías Eléctricos de Vigo. Tiña como obxectivos a construción, explotación e aproveitamento do tranvía urbano e suburbano de Vigo, o interurbano de Vigo a Redondela e dos ferrocarrís eléctricos de Vigo a Val Miñor. En 1918 pasa a presidir a empresa Carlos E. Gunche fillo político do anterior presidente e moi vencellado a Redondela (o seu fillo, Raúl chegaría a ser alcalde de Redondela en 1943). 

Estación de tranvía de Chapela, 1923. Vida Gallega

 

En marzo de 1922 inaugúrase a estación San Fausto de Chapela. Tras a desaparición do tranvía a estación non pasaría a ser de utilidade pública ata 1984, ano no que serían mercados por 25 millóns de pesetas polo concello de Redondela. Nestes terreos construiríase pouco despois a alameda, que no 2018 sería denominada Rosalía de Castro.

Na Gaceta de Madrid de 30 de abril de 1924 anúnciase a saída a poxa pola construción do tranvía de Vigo a Redondela En setembro, o Gobernador Civil anuncia a concesión á sociedade Tranvías Eléctricos de Vigo da construción da liña de Chapela a Redondela. Comezan daquela os traballos para ampliar o servizo a Redondela, pero o proxecto non chegou a prosperar e o tranvía nunca chegaría á vila.

Autor: Juan Migueles

BIBLIOGRAFÍA

Chapela de onte a hoxe. Gonzalo Mencía Castro. Ed. Xunta de Galicia.

Galiciana- http://www.galiciana.bibliotecadegalicia.xunta.es => El Diario de Pontevedra, El Pueblo Gallego, El Diario de Santiago, La Ilustración Gallega y Asturiana, Vida gallega, El Correo de Galicia (Bos Aires), El Progreso, La Integridad diario católico, Galicia diario de Vigo, La Idea Moderna, El Heraldo Gallego, El Áncora, La Correspondencia Gallega, El Compostelano, La Noche, El País...

Ministerio de Cultura http://prensahistorica.mcu.es=> El Imparcial (Madrid), El Heraldo de Madrid, La Epoca (Madrid), El Siglo futuro (Madrid))

Biblioteca Nacional de España www.bne.es => El Pabellón Nacional (Madrid), El Día, La Libertad, El Imparcial, La Correspondencia de España, El País, La Época, El Heraldo de Madrid, El Correo Español

La Voz de Galicia.

http://www.lavozdegalicia.es/hemeroteca/

Faro de Vigo. Hemeroteca