Lonxevidade.

 

Anciá na Rúa Prata. Foto: Otto Wunderlich, 1929. Fototeca del Patrimonio Histórico. Ministerio de Cultura.

 

Noutro apartado xa vimos a historia dun matrimonio centenario (Ver https://anecdotarioredondela.blogspot.com/2020/04/matrimonio-centenario.html ) e tirando do fío imos citar varios casos de lonxevidade en Redondela, algúns deles aínda abraiantes hoxe en día. Nos xornais antigos atopamos as seguintes noticias:

1899, marzo. En Ventosela faleceu unha muller de 108 anos.

1903, outubro. En Vilavella faleceu Josefa Barciela Lago. Era a decana dos anciáns de Redondela. Viu a luz dos séculos XVIII, XIX e XX, lembrando perfectamente a invasión francesa e conservando a vista e a razón ata o derradeiro momento.

1917, marzo. Aos 107 anos de idade faleceu a señora dona Manuela Tejo Villanueva.

1925, febreiro. En Redondela faleceu o veciño daquela vila, Aquilino Fernández que contaba 111 anos de idade. Deixa 14 netos, 46 bisnetos e 1 tataraneto. Os seus fillos faleceron antes que el.

1946, decembro. Faleceu aos 117 anos en Redondela, Serafina Lais Somarriba, coñecida como “La Castellana”, e que leva residindo na vila moitos anos. Ningún dos seus fillos vive en Redondela, pero si gran cantidade de netos, bisnetos e tataranetos. En Algeciras tamén viven moitos dos seus descendentes, que, en total, son máis de 60. (19461231 El pueblo gallego)

1973, novembro. No Fogar do Pensionista da Seguridade Social, púxose punto final á Semana Internacional de Homenaxe aos Nosos Maiores coa elección dos avós do ano na provincia. Entre os homenaxeados estaba Dolores Rodríguez, de Saxamonde, con 104 anos.

1993, maio. Ao cumprir cen años, don Crisanto Couto Albán, acompañado da súa esposa, dona Pilar Rodríguez- Villarino y Guerra- Garay, ofreceu unha cea, seguida de baile, no Gran Hotel da Toxa despois de haber asistido, xunto aos seus familiares e amigos, a unha misa na capela da illa.

2002. Faleceu o veciño de Zacande (Cesantes) Campio Fernández Soto “o da Amalia”. Naceu en 1895 e estaba a piques de cumprires os 107 anos, pasando así por tres séculos. 

2013, 22 de outubro. Falece aos 102 anos Rosario Cal Fernández. O seu irmán Emilio tamén chegaría aos cen anos.

Autor: Juan Migueles

BIBLIOGRAFÍA

Galiciana- http://www.galiciana.bibliotecadegalicia.xunta.es => El pueblo gallego, El Progreso, La Idea Moderna, El Correo de Galicia

La Voz de Galicia

Aportes José Antonio Martínez Fernández, Xosé Moreira Docampo