Futbolistas. S. XXI

Ascenso Córdoba Fª Foto @Bouzon_iago

        Defensa Central. Pasou do Casa Paco ás categorías inferiores do R. C. Celta. Foi internacional nas categorías inferiores da selección española destacando o triunfo na Meridian Cup Sub-17 e o segundo posto no Campionato Mundial Sub-20, no que tiña como compañeiro a Iniesta. Tamén formou coa Sub-21 e coa Selección Galega contra Uruguai e Camerún.

        Na tempada 1999-2000 debutou co R. C. Celta con tan só 16 anos en Montjuic fronte RCD Español substituíndo a Makelele. Na 2004-05 pasa a formar parte do primeiro equipo acadando o ascenso a Primeira.

         Na tempada 2005-06 xoga cedido no Recreativo de Huelva, co que ascende novamente a Primeira. É fichado polo club por catro tempadas, descendendo na 2008-09.

         Na 2010-11 marcha ao chipriota Omonia Nicosia que se clasificara o ano anterior para xogar a fase previa da Champions. Na súa primeira tempada o equipo gaña a Copa de Chipre e na segunda a Copa e a Supercopa, ademais de xogar a previa da Europa League. Nesta segunda tempada sofre unha operación da cadeira que o deixa seis meses sen xogar.

         De regreso a España, ficha polo Jerez C. D. de 2ª División. Para a 2013-2014 ficha polo Córdoba C. F., co que acada un novo ascenso a 1ª. Na seguinte tempada atópase a porta da titularidade pechada, o que unido a ter que pasar novamente polo quirófano, fai que dispute poucos minutos. Na 2015-16 volta a 2ª co Club Gimnàstic de Tarragona co que xoga unha promoción a primeira e no que actúa como titular ata o 2017 no que colga definitivamente as botas.

En 2018 entraría nun programa dirixido a ex-futbolistas profesionais para acadar o título de adestrador UEFA Pro con Raúl, Xavi Alonso, Senna...

Foto: Getty images. Jasper Juinen.

Foto: Faro de Vigo

David Costas: David Costas Cordal (Chapela, 26/03/1995):

        Defensa Central. Deu as súas primeiras patadas a un balón no pavillón de Chapela, logo iniciouse no fútbol cos benxamíns do Chapela e xa alevín marcha para o Celta. Na tempada 2013-14 Luis Enrique faino debutar en Primeira co R. C. Celta, con tan só 18 anos. Ao rematar a tempada o troco de adestrador relégao ao banco. No verán de 2015 Luis Enrique tenta fichalo para o Barcelona B, que descendera a 2ªB, pero o Celta non quere desprenderse do xogador. Finalmente renova ata o 2019 e marcha cedido ao Mallorca de 2ª división. Para a 2016-2017 volta ao R. C. Celta, onde Berizzo non conta con el e ao abrirse o mercado de inverno vai de novo cedido a 2ª, nesta ocasión ao Oviedo, onde se estrea como goleador. En 2017 marcha ao Barcelona B, onde troca a súa posición pola de lateral dereito. Na tempada 2018-19 de novo no R. C. Celta, disputa 15 partidos de Liga e 1 de Copa cos que logra a renovación do seu contrato que expiraba no 2020. Na seguinte tempada non conta con minutos e en xaneiro de 2020 é cedido ao UD Almería, de 2ª, con opción de compra.

 Foto www juegalaroja com

Pablo Couñago: Pablo González Couñago (Redondela, 09/08/1979):

        Dianteiro. O seu maior logro foi o Campionato do Mundo Sub-20, formando parte dunha selección española na que xogaban entre outros Casillas, Xavi e Marchena. Neste torneo recibiu a bota de ouro (máximo goleador) e o balón de bronce (terceiro mellor xogador). Coa selección Galega xogou contra Ecuador.

        Formado na canteira de Casa Paco pasou ao Celta Xuvenil. Tras xogar no Celta B foi cedido aos equipos de Segunda División, Numancia (1998-99) e Recreativo de Huelva (1999-2000). O 15 de outubro do 2000 debutou en Primeira co R. C. Celta. Canso das poucas oportunidades que se lle daban neste club, na tempada 2002-03 ficha polo Ipswich Town da Premier League inglesa, que ese mesmo ano descende á First Division (actual Championship). Despois de marcar 31 goles en 4 tempadas, volta á Primeira División española fichando polo Málaga en 2006. Forma dianteira co internacional Salva Ballesta pero o equipo tamén descende.

 En 2007 regresa ao Ipswitch Town, que segue na Championship. Nesta tempada marca un gol de calcaño que é considerado o mellor gol da liga Inglesa. O 21-8-2010 é cedido ao equipo Cristal Palace, de Londres, que tamén disputa a Championship.

Ao inicio da tempada 2011-2012 atopábase sen equipo. Despois de considerar varias ofertas decide marchar a xogar a Vietnam co Dong Tam Long An F.C. que milita na 2ª división. A finais do 2012 continúa a súa aventura asiática fichando polo Kitchee de Hong Kong. Alí comparte vestiario con tres galegos, Dani Cancela, Yago González e “Chino” Losada.

De volta a España e agardando mellores ofertas, en novembro do 2013 ficha polo C.D. Choco, co que logra unha gran media goleadora. Para a seguinte tempada acepta a oferta de Shefki Kuqi, adestrador do F. C. Honka Espoo, e co que coincidira cando era xogador do Ipswich. Este equipo de Helsinki (Finlandia) xoga na 1ª división e está clasificado para a previa da Europa League 2014-15. Pablo desta volta marcha acompañado polos xogadores do C. D. Choco, Caloi e Yeray, e cos tamén galegos Martín Fernández (Barbadás) e o técnico do xuvenil B do Celta, José Luis Riveiro. Despois dunha boa tempada problemas económicos no club fan que en 2015 os redondeláns marchen ao club da Segunda finesa, Pk35 Vantaa.

En 2016 volta a Galiza, nesta ocasión ao Alondras C. F., de 3ª división e adestrado polo seu amigo Jacobo Montes. En 2017, con 38 anos, regresa ao C. D. Choco, retirándose ao final da tempada despois de que o equipo vencera na Copa Deputación.

 

Foto: la Voz de Galicia

 Foto: FC Honka Espoo

Yeray: Yeray Couñago Vilaboa (Redondela, 11-10-1991):

          Medio centro. Formado no C.D. Choco, equipo co que xoga en Preferente. Da o salto a 2ªB co Coruxo F. C. na 2012-2013. Regresa ao C. D. Choco, que acaba de ascender a Terceira para a 2013-2014. Ao rematar a tempada, con Pablo Couñago e Caloi, marcha a Helsinki a xogar co F. C. Honka Espoo, equipo que disputa a 1ª división e a previa da Europa League. Como xa comentamos, apesares de realizar unha boa tempada, problemas económicos fan que en 2015 os redondeláns abandonen o club, fichando por un segunda daquel país, o Pk35 Vantaa.

         En 2016 veuse con Pablo Couñago ao Alondras CF, de Cangas. Ao remate da tempada ficha polo Arosa S. C. En 2018 volta ao fútbol finés co Kotkan Työväen Palloilijat e remata a tempada co C. D. Choco.

Foto: La Voz de Galicia

Lloves: Sergio Lloves Ferreiro (Redondela, 02/09/1987):

        Porteiro. Da canteira de Casa Paco xogou en 3ª co Coruxo F. C. (2009-2010), Rápido de Bouzas (2010-2012) e Pontevedra C. F. (2012-2013). No verán do 2013 fichou polo Olafsvik Vikingur da Primeira División de Islandia, para os últimos 6 partidos da liga. Tan corto período serviulle para recibir o premio ao mellor debutante e recibir unha oferta de renovación. Durante o descanso invernal naquel país, en febreiro do 2014 aproveita para ir xogar co Villalonga C. F. na Rexional Preferente. Abandona definitivamente Islandia en xullo do 2014, regresando ao Pontevedra C. F., onde se atopa a porta da titularidade pechada, pero o equipo acada o ascenso a 2ªB. Na 2015-16 continúa repetindo o papel de suplente e ao abrirse o mercado de inverno tenta fichar por un equipo de Centroamérica pero a operación non chega a realizarse. Permanece daquela sen equipo ata que en xuño do 2016 volta a 3ª da man do Arosa S. C.

Foto: La Voz de Galicia

Mateo: Mateo Míguez Adán (Redondela, 11/05/1987):

        Media-punta. Formado no Casa Paco pasou ás categorías inferiores do R. C. Celta con tan só 9 anos. Logo daría o salto ao Celta B e, o 13 de xaneiro do 2010, debutaría co R. C. Celta nun partido de Copa no que eliminarían ao Villarreal. Na tempada 2010-2011 sitúase como máximo goleador do Celta B, o que lle permite ter oportunidades en 2ª co primeiro equipo. Pero a sorte non lle acompaña e na 2011-12 ficha pola Ponferradina que descendera a 2ª B. Este mesmo ano o equipo enfróntase ao Real Madrid na Copa do Rei e acada o ascenso a Segunda. Despois do seu paso pola división de prata para a 2013-14 volta a fichar por un equipo de 2ª B, o Guadalajara. Neste equipo non ten continuidade e marcha ao Coruxo F. C., na mesma categoría.

         En maio de 2015, marcha a Finlandia para xogar no Pk35 Vantaa, de 2ª división, xunto a Pablo Couñago, Caloi e Yeray. Para a 2016-17 volta a 2ª B co Coruxo, equipo no que continúa.

Foto FC Honka

 “Caloi”: Carlos Rodríguez Portela: Dianteiro do C. D. Choco, co que fai unha boa tempada en 3ª División. En 2014 con Pablo Couñago e Yeray ficha polo F. C. Honka Espoo, de Helsinki (Finlandia), equipo de Primeira co que disputan a previa da Europa League. Despois dunha boa tempada problemas económicos no club fan que en 2015 os redondeláns marchen ao club de 2ª, Pk35 Vantaa. En 2016 acompaña a Mateo ao Coruxo, de 2ª B, pero apenas conta con minutos e en

xaneiro de 2017 volta ao C. D. Choco. En outubro do 2017 marcha outra vez ao F. C. Honka, xogando os derradeiros 15 partidos e acadando o ascenso a 1ª. Na 2018-19 forma de novo co C. D. Choco.

Foto: Pontevedra CF

Bruno Rivada Lusquiños (Redondela, 10/04/1995). Defensa Central que debutou co Pontevedra CF despois de curtirse no xuvenil, no B e ser cedido ao Bertamiráns. En xaneiro do 2018, con 22 anos foi fichado polo CD Mirandés, de 2ªB, e en xullo dese mesmo ano pola UD San Sebastián de los Reyes. En 2019 volta a Galicia co Racing de Ferrol.

Foto: RC Celta

Roberto Sánchez: Roberto Carlos Álvarez Sánchez “Rober” (9-3-1975): Líbero. Fillo de redondeláns emigrantes, naceu en Alemaña. Comezou a xogar no Sárdoma de Vigo, pasando logo aos Celta xuvenil e de alí ao Celta B de 2ªB, na 1993-94. Chegou a debutar nun partido de Copa co primeiro equipo do R. C. Celta, sería en Balaídos o 13 de decembro de 1995, fronte ao Andorra. Sen máis oportunidades e despois de varias tempadas no Celta B, en 1998 marcha para o U. P. Langreo que disputa a 2ªB. Remata o seu primeiro ano como máximo goleador, pero o club descende a 3ª.

Outros futbolistas destacados

        Tamén citar aos redondeláns que integraron ao C.D. Choco nestas últimas e exitosas tempadas en 3ª. Outros xogadores destacados dos derradeiros anos que poderiamos citar serían: Roberto Casto Amoedo, Miguel Fernández “Migui”, Aitor Gómez, Rubén López “Tubo” ou Pelayo Míguez.

         Como valores de futuro citar a:

Miguel Rodríguez Vidal (Redondela, 29/4/2003). Dianteiro. Cadete do Celta, que despois de liderar á Sub-15 e ser pretendido polo Barcelona, en 2018 foi convocado por primeira vez pola Sub-16 e inmediatamente despois pola Sub-17, onde se estreou como goleador. Na tempada 2019-20 debuta co Celta B.

David Vilán Alonso (Redondela, 8/3/2003). Extremo. Cadete do Celta que despois de pasar pola Sub-15, en 2018 debuta coa Sub-16 e en 2020 coa Sub-17.

Miguel Rodriguez e David Vilán. Faro de Vigo

Samuel Santos Corueja “Samu” (Redondela). Xogador do C. D. Choco fichado no 2019 polo Rayo Vallecano B, xunto ao seu compañeiro Xián González Rodríguez. Canso de non contar con minutos volta ao C. D. Choco antes de finalizar a tempada.

 Autor: Juan Migueles

BIBLIOGRAFÍA. 

RC Ferrol www.racingclubferrol.net

Faro de Vigo

La Voz de Galicia

Marca http://www.marca.com

El Mundo Deportivo www.elmundodeportivo.es/hemeroteca

Atlántico Diario http://www.atlantico.net/hemeroteca.php

www.ceroacero.com

www.bdfutbol.com

http://www.hi20.es/

www.transfermarkt.es

www.lapreferente.com