Anecdotario Redondelán: Petróglifos e chozo no Viso

sábado, 16 de febrero de 2019

Petróglifos e chozo no Viso

Pena das Rodiñas. Foto: J. Migueles

Ademais da Bañeira e da Pedra da Moura (Ver https://anecdotarioredondela.blogspot.com/2019/02/a-baneira-da-moura-e-pedra-da-moura-o.html ) e dos petróglifos catalogados no monte da Peneda (Ver https://anecdotarioredondela.blogspot.com/search?q=Peneda ) no Viso atopamos varios gravados en diversos puntos da parroquia:

Petróglifos da Gándara

Partindo do aparcamento do campo de fútbol seguimos á esquerda a pista de terra collendo o primeiro cruce á dereita. Atoparemos unha rocha que no punto máis próximo ao sendeiro ten gravada a palabra “VISO”. Coa luz axeitada veremos moitas coviñas e trazos circulares, na maioría dos casos aproveitando o propio relevo da rocha. Medidas: 4’50 x 2’20. Altura: 0’65.

Ubicación: 42.31477, -8.59561

Petróglifo da Gándara. Fotogrametría Xosé Couñago.

Petróglifo da Gándara. Foto: Mª José Alonso.

Petroglifos na Nogueira

Pena das Rodiñas (As Longras (A Nogueira-O Viso))

Debe o seu nome ás composición circulares concéntricas con varias liñas radiais. Atópase nunha depresión do terreo a carón dunha pista de fútbol sala. Cara a 2008 intentouse construír neste lugar unha casa da cultura e o movemento de terras semienterrou esta laxe. As obras serían paralizadas pola Dirección Xeral de Patrimonio pero boa parte do petróglifo quedou baixo a terra e o resto quedaría oculto polas silveiras.

Ubicación:

42.313822, -8.588852

Pena das Rodiñas. Fotogrametría Xosé Couñago.

Pena das Rodiñas. Foto Juan Migueles.

Pena das Rodiñas. Foto Juan Migueles.

Pena das Rodiñas. Foto Juan Migueles.

Pena das Rodiñas. Fotogrametría Xosé Couñago.
- Rocha de 1’85 (N-S) x 1’40 (L-O) dividida en dúas por unha diaclasa.
  
  Motivo 1. Na parte central ten unha protuberancia onde destaca unha gran cova ovoide de 13 x 10 cm. cunha profundidade de 4 cm. Preto dela podemos ver un círculo de 10 cm. con coviña central, do que parte un apéndice tamén duns 10 cm. O círculo está partido en dous por unha fenda natural.
  
  Motivo 2. Na outra metade da rocha, nun plano máis baixo vese unha espiral que acada os 29 cm. de diámetro. Dela parten dúas liñas. Unha a une a coviña central de dous círculos concéntricos moi desgastados. A segunda, máis longa, únese a unha figura irregular que rodea unha coviña central.
  
  Esta rocha está na beira dun camiño que leva a un depósito de auga, polo que xa presenta golpes polo paso de tractores. Sería preciso tomar medidas para evitar danos maiores.
  
  Ubicación:
  
  42.311909339, -8.58877136442