Ruta das Pedras e petróglifos de Ventosela.

 

Ruta das Pedras. Mapa proporcionado pola Asociación de Veciños de Ventosela

A Ruta das Pedras.

        Sendeiro circular de 10 quilómetros e dificultade media con impresionantes vistas á Ría de Vigo. Atópase na parroquia de Ventosela e preto da igrexa xa podemos ver as primeiras indicacións do camiño.

Máis información: http://acitania.com/ventosela/

Nesta ruta atoparemos curiosas formacións rochosas ligadas a diferentes lendas:

1. As Pedras Agudas. Grupo de rochas afiadas das que se conta que por debaixo pasaba un río que se podía oír.

   

   Pedras Agudas. Foto: J. Migueles

   
    

   

   Miradoiro das Pedras Agudas onde se instalou unha escultura amnistiada do ArteLixo. Foto: J. Migueles

   
    

2. Laxe das Abellas. Cóntase que nela había moitas abellas, polo que se chegou a poñer colmeas para recoller o mel.

   

   Laxe das Abellas. Foto: J. Migueles

   
    

3. A Pedra Taió. Ligada ás lendas dos mouros e os seus tesouros.

   

   A Pedra Taió. Foto: J. Migueles

   
    

4. Pedra Erosionada. A auga, o vento e o frío configuraron esta rocha dándolle curiosas formas.

   

   Pedra Erosionada. Foto: J. Migueles

   
    

5. Pedra que Fala. Forma unha pequena cova na que a nosa voz produce reverberacións.

   

   A Pedra que Fala. Foto: J. Migueles

   
    

    O outro gran atractivo desta ruta son os petróglifos, que están agrupados en dous grandes grupos: Petróglifos do Eido do Vento e Petróglifos da Pedreira.

Petróglifos do Eido do Vento

Petróglifo Eido do Vento 1.

Atopado por Antonio M. Verdeal durante unha visita guiada dirixida por A Citania en 2019. Está nunha rocha na continuación cara o monte do camiño que sube á igrexa, o que provoca que estea moi desgastada. Está a ras de chan, con medidas de 1,50 x 1,30 m. Combinación circular de 32 cm de diámetro con coviña central e varios círculos concéntricos moi desgastados.

Localización: x:534277, y:4683250

 

Eido do Vento 1. Foto: J. Migueles

        Os 3 seguintes petróglifos serían catalogados tamén en 2019 por membros de A Citania S. L., empresa que organizaba visitas guiadas polo arqueólogo Xurxo Constela.

Petróglifo Eido do Vento 2.

Nunha rocha a ras de chan, de forma triangular de 1,80 m. de lado, con

moitas diáclases fracturando o soporte, aparecen repartidas polas superficie

ata 6 cazoletas de 3 cm de diámetro.

Localización: x:534276, y:4683286.

 

Eido do Vento 2. Foto: J. Migueles

Eido do Vento 2. Fotogrametría Xosé Couñago

Petróglifo Eido do Vento 3.

Nunha rocha a ras de chan, de forma rectangular de 2,50 x 1,30 m (eixos

leste-oeste e norte–sur respectivamente) aparecen repartidas polas superficie

gran número de cazoletas de entorno a 3 cm de diámetro medio. Entre as

cazoletas vense trazos sinuosos con dirección norte-sur.

Localización: x:534367, y:4683293

 

Eido do Vento 3. Foto: J. Migueles

Eido do Vento 3. Foto: J. Migueles

Petróglifo Eido do Vento 4.

Rocha duns 40 cm. de altura, de forma irregular de 4 x 3 m. con moitas diáclases fracturando o soporte, na que atopamos diferentes motivos de difícil lectura e percepción. O máis claro está formado por sucos sinuosos pechando un gravado de 30 x

30 cm. con forma indeterminada. Nos extremos oeste e norte do aparecen coviñas de pequeno tamaño

dimensións.

Localización: x:534360, y:4683281

 

Petróglifo Eido do Vento 4. Foto: Xosé Covelo.

Petróglifos da Pedreira.

Petróglifos da Pedreira 1. Conxunto de 7 rochas que presenta petróglifos con escenas ecuestres, coviñas e grandes círculos concéntricos. Imaxes de cabalos hai en varios puntos de Galicia, o que fai especiais a estes gravados son as escenas de monta, que non son tan frecuentes. Moi recomendable a visita nocturna por seres os petróglifos máis espectaculares do Concello de Redondela. O máis curioso é que isto tan só é unha parte do que debeu haber porque gran parte das rochas foron cortadas polos canteiros. Por aportes orais sabemos que a parte que falta da rocha principal era moi empinada polo que era chamada Pedra Escorregadoira, xa que a rapazada a empregaba para lanzarse por ela.

 

Petróglifos da Pedreira 1. Panel A Citania S. L.-Concello de Redondela

Petróglifo da Pedreira 1.1. Fotogrametría Xosé Couñago

 

Petróglifo da Pedreira 1.1. Foto: J. Migueles

Petróglifo da Pedreira 1.2. Foto: J. Migueles

 

 

 

 

 

 

 

 

 

 

 

 

 

 

 

 

 

 

 

 

 

 

 

Petróglifo da Pedreira 1.2. Fotogrametría Xosé Couñago

Petróglifo da Pedreira 1.3. Foto: J. Migueles

 

 

Petróglifo da Pedreira 1.4. Foto: J. Migueles

 

 

Petróglifo da Pedreira 1.6. Foto: J. Migueles

 

Petróglifo da Pedreira 1.7. Foto: J. Migueles

Petróglifos da Pedreira 2. Combinacións circulares e coviñas de gran tamaño.

Petróglifo da Pedreira 2. Foto: J. Migueles

Petróglifos da Pedreira 3. Rocha cortada polos canteiros. A parte superior (a uns 70 cm. de altura) na que se sitúan os gravados ten uns 0,78 m (N-S) x 1,22 m (L-O). Os motivos representados son dúas combinacións circulares de 9 e 12 cm. de diámetro, formadas por dous círculos e coviña central. Están rodeadas por varias coviñas, algunhas delas poderían ser o centro de combinacións circulares moi desgastadas.

        No plano inclinado da rocha poden observarse:

No lado esquerdo un grupo formado por 3 coviñas.

No lado dereito dúas combinacións, unha de dous círculos e coviña central e outra dun único círculo con coviña central. Sobre eles hai a figura dun cabalo. Apréciase algunha coviña mais (pode que rodeada dun círculo) e no extemo dereito unha coviña de gran tamaño.

Petróglifo da Pedreira 3. Foto: J. Migueles

Petróglifo da Pedreira 3. Fotogrametría Xosé Couñago

Petróglifo da Pedreira 3B. Preto da Pedreira 3, na compaña de Xosé Couñago, en 2025 atopamos unha rocha sen catalogar a ras de chan cun único motivo formado por dous círculos con coviñas no interior unidos por unha liña.

 

Petróglifos da Pedreira 4. Rocha a ras de chan (1,75 x 2,60 m.) cunha gran suco duns 50 cm. rematada nos estremos por 2 profundas coviñas de 4,5 cm., pode confundirse cunha cruz xa que o centro é cruzado por unha depresión natural da rocha.

        No resto da superficie pódense observar unhas 11 cruces latinas de diferentes tamaños, estando algunhas delas rematadas tamén nos extremos con coviñas. O conxunto vai acompañado por abundantes coviñas duns 3-4 cm. e unha profundidade aproximada de 1,80 cm Baixo tres destas coviñas que están aliñadas aparecen as letras “RS”, polo que podemos atoparnos ante un antigo linde de Redondela e Soutomaior.

Petróglifo da Pedreira 4. Foto: J. Migueles

Petróglifo da Pedreira 5. Petróglifo realizado cun obxecto de metal polo que os sucos son máis finos que os dos grabados realizados con pedra nunha rocha de orientación sur a ras de chan duns 2 x 1 m. Aparecen dous motivos de difícil interpretación, o máis grande de forma lanceolada (30 x 20 cm.) e o outro de forma triangular de 10 cm. de lado. Podería ser a representación dunha edificación cunha construción anexa.

A escasos metros cara o sur, nunha pedra do mesmo afloramento aparecen dúas coviñas.

Petróglifo da Pedreira 5: Foto: J. Migueles

Pedreira 5. Fotogrametría Xosé Couñago

Os dous seguintes petróglifos serían atopados en febreiro de 2019 por Xosé Couñago nunha busca na que ía acompañado polo arqueólogo Xurxo Constela:

Petróglifo da Pedreira 6.

Nunha rocha cadrada a ras de chan, de 1,20 x 1,50 m, aparecen catro sucos sinuosos que se desenvolven, máis ou menos, de norte a sur do penedo. Son gravados bastante profundos cicelados con perfil en forma de “V”. O máis longo ten 1 m de longo. (Recollido no PXOM como Eido do Vento 6)

Localización: x:534364, y:4683591

 

Petróglifo do Vento 6. Foto: A Citania S. L.

Petróglifo da Pedreira 7.

Gran rocha en pendente cunhas dimensións de 6 x 4 m. (eixos norte-sur e leste

oeste respectivamente) e sobresae a penas 40 cm do solo. No centro da parte superior e como motivo principal temos unha combinación circular con 5 círculos concéntricos (o maior de 28 cm de diámetro) e cazoleta central desde a que parte un apéndice que sae en dirección norte-sur. A ambos lados deste gravado vemos outros motivos. Ao seu carón leste aparece outro pequeno círculo, de 17 cm de diámetro do que parte un apéndice que o une a 2 ou 3 círculos concéntricos moi desgastados. No lado oeste da primeira combinación aparece outra combinación de dous círculos concéntricos, de 15 cm. con coviña central da que parte un apéndice que a une ao borde exterior dun círculo con coviña central. Semella que pode haber máis motivos moi desgastados cara o borde da rocha.

No centro da rocha atopamos outra pequena combinación de 2 círculos de 12 cm con cazoleta e apéndice central. (Recollido no PXOM como Eido do Vento 7)

O PXOM de Redondela tamén recolle: “Ao norte deste penedo aparece outra rocha, a ras do chan de 1,50 x 0,90 m. (eixes norte-sur e leste–oeste respectivamente) onde atopamos unha cruz grega de 12 x 12 cm gravada con instrumento metálico, polo que podemos deducir que se poida tratar dun gravado de termo”. Omite dicir que a pedra está chea de picadas de canteiro e que a cruz non amosa un trazado limpo, polo que persoalmente (como afeccionado que son) dubido que esteamos ante unha cruz de termo.

Localización: x:534327, y:4683458

 

Petróglifo da Pedreira 7. Fotogrametría Xosé Couñago

Outros petróglifos cos que podemos atoparnos durante a ruta serían:

Petróglifo do Pedroso. Combinacións de círculos e cazoletas. Seguindo a interpretación dada por Ferro Couselo podería tratarse dun antigo linde entre Ventosela e Amoedo, ou sexa, entre os concellos de Redondela e Pazos de Borbén, 

 

Petróglifo do Pedroso. Foto: J. Migueles

Antigo linde. Silueta dunha cruz que en tempos marcaría tamén o límite entre Ventosela e Amoedo.

Cruz de Linde. Foto: Xelah Dos

Petróglifo da Canteira. Descuberto en outubro de 2020, aínda sen catalogar, volve a acharse un novo gravado nunha canteira abandonada. Trátase de combinacións circulares. A un lado desta rocha hai unha con dúas coviñas e ao outro unha con unha coviña.

42.29585,-8.56861

 

Petróglifo da Canteira, sen catalogar. Foto: J. Migueles

Petróglifo da Canteira. Fotogrametría Xosé Couñago

Outros petróglifos de Ventosela

Dentro da parroquia de Ventosela e próximo a esta ruta atopamos outro grupo de gravados, os Petróglifos do Campelo:

Petróglifo do Campelo 1: Rocha de 4,50 m (N-S) e 3,60 m (L-O) na cal se poden apreciar unhas 8 combinacións circulares. As máis grandes están formadas por 5 círculos concéntricos con coviña central. 42°18'4.00"N, 8°34'30.28"O

 

Petróglifo do Campelo 1. Foto: J. Migueles

Petróglifo do Campelo 2: A vexetación impediu a observación dos mtivos nas visitas realizadas. Rocha de 3,10 m (N-S) e 2,10 m (L-O) con dous círculos concéntricos de dúas liñas e cazoleta central.

42°18'4.00"N, 8°34'30.28"O. (535028, -4683315)

Outros Gravados sen catalogar. Probablemente máis recentes que os anteriores. Trátase de dúas rochas separadas uns 30 metros cun único motivo, un rectángulo dividido por dúas liñas en 4 partes iguais. Pode tratarse de lindes dunha propiedade se consideramos que as dúas liñas forman unha cruz e están aliñadas. Outra posibilidade sería que foran marcas de canteiro, tendo en conta que estamos nun lugar onde se extraeu moita pedra. Unha terceira opción, menos probable, sería a de un taboleiro de xogo medieval.

42°18'03.1"N 8°34'31.1"W

42°18'02.3"N 8°34'32.2"W

Sen catalogar 1. Foto: J. Migueles

 

Sen catalogar 2. Foto: J. Migueles

 

Mapa co patrimonio arqueolóxico de Redondela

https://www.google.com/maps/d/edit?mid=1H4p5MqFehMbWImfzqYxL5yz042_xedYd&usp=sharing

Autor: J. Migueles

BIBLIOGRAFÍA

La estación de grabados rupestres de A Pedreira-Ventosela (Redondela). Patiño Gómez, Ramón. 21 pp. Ilustraciones. Separata facticia de El Museo de Pontevedra. Tomo XXXVI. Pontevedra, 1982."

Visitas guiadas realizadas pola Asociación de Veciños de Ventosela (2010) e por Xurxo Constela (A Citania) (2018-19).

http://patrimoniogalego.net - Óscar Franco

PXOM. Redondela.

 

 

 

 

 

 

 

 

 

 

Festas gastronómicas

 

 

Anuncio da II Festa do Mexilón. Hoja Oficial del Lunes

Ademais da Festa do Choco, no Concello de Redondela celébranse e celebráronse numerosas festas gastronómicas. (Ver https://anecdotarioredondela.blogspot.com/2022/05/a-festa-do-choco.html )

Festa do Mexillón.

Apesares de algúns anos que non se organizou, esta é a primeira festa gastronómica do Concello de Redondela, xa que se celebrou por primeira vez en 1963. Celébrase en agosto ou setembro en Chapela.

Festa da Mazá.

1º domingo de outubro en Negros (diante do centro cultural).

Festa adicada á mazá e os produtos elaborados con esta froita como a torta de mazá ou a sidra. Esta mazá chegou a comercializarse como vimos na seguinte entrada: (Ver https://anecdotarioredondela.blogspot.com/2023/11/a-maza-redondela.html )

Magosto.

Festa tradicional galega na que se asan castañas. Está vencellada ao día de San Martiño, que é patrón de Ventosela e de Vilar de Infesta. No resto do Concello de Redondela hai varias iniciativas neste senso, sendo a do Centro Cultural de Cedeira a máis veterana e o “Castañazo”, do colectivo Sinha Paca, unha das máis recentes.

Festa do Cocido.

En Trasmañó, incluída dentro da programación das festas patronais de San Vicente.

Festa da Navalla.

Celébrase no verán en Chapela.

Festa de Carne ao Caldeiro

Organizada por primeira vez en 2025 ana parroquia de Quintela.

Festas gastronómicas desaparecidas.

Entre as festas desaparecidas máis destacadas podemos citar:

Festa do Carallote

Iniciativa da Confraría de Pescadores para potenciar a venda deste marisco, tamén coñecido como longueirón, que é moi abundante en Cesantes. Comezou a celebrarse en 2016 no peirao de dita parroquia. Na edición de 2019 servíronse 800 quilos á prancha, en salsa ou arroz, ademais de empanada de trigo e millo e coa novidade de empanadillas. Esta festa estaba a crecer cando o inicio da pandemia parou todas as actividades deste tipo.

Foto compartida pola organización da Festa do Carallote.

Festa da Orella de Porco.

Festa xa desaparecida que comezou a celebrarse na década dos 90 do pasado século en Cedeira. A data de celebración era a 1ª quincena de novembro.

Festa do Viño da Casa.

En xullo na área recreativa de Chan das Pipas (Saxamonde). Comezou a celebrarse no 2008, organizada pola Asociación Deportivo Cultural Chan das Pipas. Nela pódese degustar os viños de pequenos produtores da zona acompañados por carne ao caldeiro, polbo e empanada a prezos populares.

Ruta do Pincho

Festa de breve vida, comezou a celebrarse en 2012 co obxectivo de promover a hostalaría local imitando iniciativas doutros concellos. Cada cafetería ou restaurante ofrece un pincho e unha comisión a un prezo especial elixíndose o que máis guste.

Festa do polbo e o Churrasco.

No barrio da Teixeira, no Viso.

Autor: Juan Migueles

BIBLIOGRAFÍA

Faro de Vigo

Aportes orais.

Colectivos da Democracia (Finais do S. XX)

 

Abrente-Limpeza da praia de Cesantes, 1997. Foto: Félix Cal Cortizas

        Coa chegada da democracia o asociacionismo vai collendo gran importancia principalmente coa construción de centros culturais nas parroquias, que nos seus primeiros anos amósanse moi activos, ademais servirán de sede a asociacións de veciños e comunidades de auga e montes. No centro urbano de Redondela agroman colectividades de todo tipo. Nos anos 90 é o momento de maior esplendor creándose ducias de colectivos no noso Concello, 15 tan só en 1994. Moitas delas desaparecerían, pero outras aínda manteñen a súa actividade. A continuación enumero algunhas delas:

Abrente

        Asociación veciñal de Redondela. Fundada en 1995, sendo a primeira presidenta María Ángeles Pérez Espiña. Entre as súas iniciativas estivo a oposición a que o centro médico se construíra na Marisma. Tamén protestou por temas como o ruído dos pubs da rúa Prata ou o vertedoiro da Marisma.

Agrupación de Voluntarios de Protección Civil de Redondela

        Constituída en 1985.

Aldeas Infantiles.

        Entre os acordos do pleno do 14 de maio de 1975 do Concello atópase a autorización da obra de construción das dúas primeiras vivendas de Aldeas Infantiles S. O. S. en Ventosela. O 7 de novembro toman posesión de ditas casas oito irmáns de apelido Vieitez de Carril (Vilagarcía) e sete irmáns, dunha familia de doce, de Solleiro (Tui). A cesión de terreos en 1971 por parte do Concello a dita institución partiría da iniciativa de Rita Regojo, quen posteriormente sería nomeada Filla Predilecta.

 

Aldeas Infantiles 1976. Foto: Magar. Faro de Vigo.

Alén Nós.

        Creado en 1996 o obxectivo da recuperación, defensa e posta en valor do patrimonio histórico e etnográfico, tanto material como inmaterial de Redondela. Ten a Andrés Couñago Laxe e Xosé Couñago como cabezas máis visibles. Entre as súas iniciativas podemos destacar: a proposta en 1997 da creación dun museo etnográfico recollendo ferramentas antigas e outras pezas como o reloxo da igrexa de Redondela, creación a festa dos Fachos no Viso, denuncia da destrución de parte do noso patrimonio (como no caso das mámoas), solicitude da posta en valor do cemiterio dos Eidos ante o intento de desmantelalo, organización de conferencias, proxeccións de documentais... En 2014 presentou Redondelar, proxecto de divulgación do patrimonio cultural arquitectónico, realizado por A Citania e no que colaboran Concello e Asociación de Empresarios.

Alén Nós, campaña cos colexios, 1998. Ricardo Grobas. Faro de Vigo

Amigos do Ferrocarril e Tranvía Rías Baixas.

        Asociación fundada en Vigo e que establecería a súa sede na estación de Redondela a finais dos 90.

Apros (Asociación para la Promoción Social)

Asociación Cultural e Deportiva da Miñoteria (Ventosela)

Nos anos 80 colaboraba coa Comisión de Festas de San Martiño programando xogos tradicionais, no que destacaba o xogo do trompo.

 

Asociación Cultural e Social de Chapela.

        O 30 de novembro de 1991 constitúese a Asociación Cultural Banda de Música de Chapela, sendo elixido Alejandro Bastos como primeiro presidente. Era o ideólogo desta iniciativa que creou a Escola de Música de Chapela coa finalidade de crear unha banda de música nesta parroquia o que se conseguiría en 1995. No seu primeiro ano de vida organizou a Festa dos Maios, Festival de Muiñeiras, Festival de Rondallas, Concerto de bandas de música, encontros de Grupos de Gaitas e Magosto. Ademais de promover a creación de grupos de teatro, gaitas, pandeiretas e guitarras. Despois trocaría o nome por Asociación Cultural e Social de Chapela.

Asociación de Empresarios de Redondela.

        En 1990 xa contaba con 200 asociados e acababa de adquirir un piso como local social. Desta asociación xurdiu a idea de celebrar a Festa do Choco.

Asociación Vecinal Los Ángeles (Chapela)

        En 1992 crea sección de fútbol sala nas categorías alevín, infantil e cadete. Tamén crearon equipos en Campo a través, balonmán feminino e tenis de mesa.

Asociación de Vecinos de Chapela

Asociación de Vecinos Eidos de Quintela

        Mantivo unha acalorada polémica en 1980 co cura párroco por mor do cemiterio.

Asociación de Veciños a Nosa Illa (Cesantes)

        Primeira asociación de veciños de Cesantes, fundada en 1978.

Asociación de Vecinos O Noso Mar de Cesantes

        Cara a 1984.

Asociación de Vecinos Unión de Vilar

        Moi activa en 1982 na reclamación dunha comunicación de transporte público que comunicara as parroquias de Vilar de Infesta e Cabeiro co casco urbano de Redondela.

Ateneo

        Colectivo fundado en 1988 co obxectivo de dinamizar a vida cultural de Redondela. En 1992 alcanzaba os cen socios que pagaban 3.000 pesetas. Organizaban conferencias, exposicións, mesas-redondas... Programaba o Verán Cultural, con concertos, conferencias e outras propostas como Pintura na Rúa, actividade na que os cativos pintaban na praza Figueroa e as súas obras eran colgadas dos balcóns onde quedaban expostas. Entre as súas iniciativas máis lembradas estivo o premio Coca-Cocón. (Ver https://anecdotarioredondela.blogspot.com/2021/02/a-coca-e-o-cocon.html )

 

Noites do Ateneo na Alfóndega. Foto cedida por Uxía Lueiro.

Cámara Agraria de Redondela

        En 1980 reclamou as indemnizacións para os veciños afectados polo asolagamento das súas leiras por mor das obras de ampliación do aeroporto de Peinador.

Casco

        Colectivo de apoio a insubmisos e obxectores de conciencia ante a obriga dos homes de realizar o servizo militar. (Ver https://anecdotarioredondela.blogspot.com/2021/04/servizo-militar-obxeccion-e-insubmision.html )

Centro Cultural de Cedeira

        Inaugurou a súa sede o 18 de agosto de 1989. Entre as súas primeiras iniciativas estivo a formación dun grupo de baile tradicional e unha rondalla.

 

1989 Inauguración do CRC Cedeira. Facebook do centro.

Cíclope, Colectivo de arte redondelano

        Organizou unha exposición de novos artistas en 1996.

Círculo Cultural Recreativo de Cesantes.

        Fundado a finais de 1978. Actualmente ten a súa sede no edificio que fora da Sociedad de Agricultores y Ganaderos de Cesantes. Neste centro creouse o grupo de baile Airiños de San Simón, o Club de Remo Cesantes e a coral Pedra Blanca.

Claqueta

        Cineclub fundado en 1994. Entre as súas iniciativas estiveron as primeiras proxeccións de cine na rúa.

Club Altamar

Colectivo de Chapela que nos anos 70, 80 e 90 organizaba numerosas actividades: festivais de teatro, campamentos de verán, partidos de balonmán, rally Pari-da Car...

 

Altamar. Faro de Vigo

Club de Jubilados General Rubín.

        Primeiro centro de xubilados da vila, creada en 1981, tiña a súa sede na rúa Xeneral Rubín, no primeiro andar da casa que fora Sociedade de Mariñeiros. En 1984, estaba formado por 124 homes e contaba con 75 socios protectores. Desapareceu cando asumiu a dirección a Xunta de Galicia, trasladándose ao edificio José Figueroa, na Xunqueira.

Faro de Vigo, 1984.

Colectivo Libertario i Ecoloxista Redondelán (CLER)

        Grupo de rapaces que exerceron unha forte oposición aos recheos na Marisma e ao vertedoiro na mesma.

Logo Martín Fernández

Consello de Educación de Redondela /Comisión de Ensino

        En 1985 comeza a publicar unha revista ou boletín mensual, adicado á escola e, en particular, aos nenos e nenas.

Entrepobos

Favercuss

Federación de APAS

        Creada para coordinar as APAS (hoxe ANPAS) das diferentes escolas do noso concello.

Federación de Vecinos

Latexos, Asociación Cultural

        Esta asociación naceu en 1981 co proxecto de reunir a aos emigrantes de Redondela máis destacado ou que levaban moito sen volver ao Concello. Despois dun ano de traballo o proxecto non se chegaría a realizar por falta de orzamento. Entre as súas iniciativas podemos citar exposicións (canteiros de Poio, traxe rexional, pintores redondeláns actuais, radios antigas... ), cursos de artesanía, escola de baile... Estaba formado por seis persoas: Gerardo Pérez, Alejandro Martínez, Bernardino, Marisa González, Pili e Aurora Bastos, esta última presidenta en 1992.

Lenda

        Asociación de familiares e enfermos mentais. Trátase dun centro ocupacional onde se realizan traballos de carpintería, talleres de escritura... Ademais practícanse varias disciplinas deportivas como serían: natación, tenis, tenis de mesa ou fútbol sala. Outra actividade é a publicación da revista A Voz de Lenda.

https://lendasaudemental.com/

 

Lenda, taller. Faro de Vigo, 2009.

Josefá

        Colectivo creador do ArteLixo e o LixoRock como protesta ao vertedoiro de lixo na Marisma. Ademais organizou varios concertos.

 

Peña Madridista Rías Bajas

Primeira peña madridista de Redondela presidida por Manolo Cao e con Manolo Conde de secretario. Como se ve na foto asistiu á presentación Luis de Carlos Ortiz, presidente do Real Madrid entre 1978 e 1985.

Peña Madridista Rías Bajas. Foto cedida por Manolo Conde.

Peña Madridista de Redondela

        Peña de seguidores do Real Madrid fundada en 1984. Conseguiu que o adestrador do equipo de baloncesto, Lolo Sáinz, dera unha conferencia no Centro Recreativo e Cultural de Redondela.

 

Peña Sietemanos (Cesantes)

        Peña de fútbol de seguidores madridistas fundada en 1967. Rendía homenaxe ao porteiro canario Antonio Rodrigo Betancort.

Scouts Búrbida de Redondela

        Grupo de scouts fundado en 1994 e que en 1998 dividíase en: Lobecos (de 8 a 11 anos), Rangers (11-13), Pioneros (14-16) e Rotas (16-19).

Sociedade Cultural do Viso

        Fundada en 1987 no antigo edificio da Sociedade Agraria do Viso.

Sociedade Labrego Cultural de Reboreda

En 1975 algúns veciños comezan a reunirse no garaxe de Manuel Barros.

En xuño de 1976 solicitan ao Concello: “A entrega do edificio da Sociedad Agraria de Reboreda para a súa dedicación a centro cultural, cooperativa, local de xuntas des distintas asociacións existentes: Mutua Gandeira, deportivas, da Auga, escola de párvulos (actual Educación Infantil)... “

En 1977, para a entrega de chaves por parte do Concello, os veciños deben construír unha vivenda anexa para re-aloxar e xestionarlle unha axuda na Caja de Ahorros Municipal de Vigo a Cándido Estremadouro “Neriñas”, quen vivía na casa dende que en 1966 se trasladara a escola ao novo grupo escolar.

1979 Constitución da sociedade, presidida por Andrés Couñago Laxe.

1981 Actúa por primeira vez o grupo de baile tradicional O Carballo das Cen Polas.

1984, 12 de xuño. Acto de entrega por parte do Concello da bandeira da Sociedade Agraria de Reboreda, atopada durante os traballos de rehabilitación do antigo cárcere como Casa da cultura.

1985. Comeza a publicarse “O Voceiro”, publicación coa actualidade da cultura galega e novas da parroquia.

1988 Inicio das obras de ampliación polo arquitecto César Portela, o que obriga a deter as actividades culturais. Encárgase a escultura do escudo de Galiza debuxado por Castelao á escultora Ángeles Valladares. Varios problemas prolongan as obras durante seis anos.

1994, abril. Inauguración do edificio restaurado. O salón de actos recibe o nome de Basilio Álvarez (líder agrarista) e a biblioteca o do escritor Eduardo Blanco Amor.

2010 Instálase o ascensor modificándose a fachada do edificio.

Inauguración da SLC de Reboreda. Foto: MundoCal-Asociación da Prensa de Vigo

Xanela, Asociación feminista de Redondela.

        Formada a finais de 1993 para afondar na realidade da muller de Redondela e atender as súas necesidades. A primeira xunta directiva estaba formada por: Francisca Crespo Barros, presidenta; María Teresa Míguez García, vice; Carmen Varela Trigo, secretaria e María del Carmen Amoedo Gómez, tesoureira.

Denunciou que daquela entre 16 e 25 mulleres eran maltratadas en Redondela, creando unha oficina de atención á muller, ata que esta foi asumida polo Concello. Entre as súas actividades poderiamos citar conferencias, mesas redondas, proxeccións de películas e documentais, publicación de libros, exposicións... A destacar a homenaxe realizada na illa de San Simón, en 1995, ás mulleres que axudaron aos presos que alí foron confinados. En 1996 crean no seu local unha biblioteca da muller.

Xanela. Foto: Félix Cal. Faro de Vigo

Xea, Grupo Ecoloxista

        Nado en 1983 da man do Ateneo Redondelán, este colectivo tentou opoñerse á degradación da Marisma: recheos, vertedoiro de lixo, ubicación do centro médico... Un dos seus maiores logros foi a de prantar 300 carballos no monte da Peneda en 1992, despois de que este sufrira un incendio. A iniciativa malograríase ao comer os animais as árbores.

Autor: Juan Migueles

BIBLIOGRAFÍA

A nosa memoria. Vintecinco anos despois. 1975-2000. Sociedade Labrego Cultural de Reboreda.

O que lembro do vivido. Andrés Couñago Laxe.

19981126 La Voz de Galicia

Banda de Música Xuvenil de Chapela. 11 de Febrero de 1995. Asociación Cultural Banda de Música de Chapela.

Toponimia de Ventosela Olga Nogueira. SNL. Concello de Redondela.

La Voz de Galicia

Faro de Vigo