O escudo e a bandeira

   

       No 2014 o Concello de Redondela encargoulle un informe histórico e heráldico ao Seminario de Estudos Redondeláns (SEREN) para acadar o deseño dunha bandeira e dun escudo como ensina do municipio, para poder rexistralo como símbolo oficial ante a Comisión de Heráldica da Xunta. O motivo deste estudo era que o escudo redondelán constaba dunha "R" maiúscula xunto a tres conchas de ouro sobre un fondo branco, o que representaba un campo de prata. Isto infrinxía as regras heráldicas ao non poder ir xuntos dous metais. Para evitar este conflito e axustarse á normativa, o Seren propón cambiar a cor do fondo a azul, tal e como aparece no escudo municipal situado na cabeceira do altar da Inmaculada Concepción da igrexa parroquial de Santiago Apóstolo de Redondela, datado no século XVIII, e considerado o máis antigo que se conserva na vila.

En canto á bandeira, o Concello carecía dun estandarte polo que se aproveita a ocasión para deseñar unha nova. Neste caso a proposta de Seren sería a cor granate baseado no histórico pendón municipal, empregado nos distintos actos solemnes políticos, culturais e relixiosos na vila. Segundo o estudo histórico, as orixes deste pendón descoñécense, "aínda que non se descarta que servise de distintivo como bandeira nalgún dos enfrontamentos contra as tropas francesas ao seu paso pola vila, en Pontesampaio ou en Vigo, no século XIX".

Escudo empregado anteriormente

          A proposta do escudo é aceptada e no DOG nº 195 do 13-10-2014 publícase o Decreto 129/2014, do 2 de outubro, polo que se aproba o novo escudo do Concello de Redondela.

«De azur (azul), a letra R de ouro (amarelo), posta no centro, e acompañada de tres vieiras, tamén de ouro, dúas no xefe e unha na punta. Ao timbre, coroa real pechada».

          Por contra a bandeira é rexeitada por infrinxir as normas da heráldica, facéndose unha serie de recomendacións para que poida ser aprobada. Finalmente sería presentada oficialmente en 2017.

Autor: Juan Migueles

BIBLIOGRAFÍA

Faro de Vigo