Curiosos vexetais do Monte Mirallo.

 

Musgo luminoso, Schistostega pennata no Monte Mirallo. Foto: J. Migueles

        O Monte Mirallo, mal chamado Monte Penide, é moi coñecido pola súa riqueza arqueolóxica (Castro de Negros, petróglifos, mámoas...) e tamén polo chamado Mellor Banco do Mundo e rutas de sendeirismo e bicicletas. (Ver https://anecdotarioredondela.blogspot.com/2019/02/monte-penide-monte-mirallo.html ). Se todos estes encantos non son suficientes tamén ten unha gran riqueza botánica. A continuación citarei tres raras especies vexetais que podemos atopar neste monte. Agardo que esta información sirva para concienciar da riqueza vexetal que temos e que debemos coidar.

Schistostega pennata.

      Trátase dun musgo luminoso chamado Ouro de Duende. É propio de zonas húmidas e escuras onde outras plantas non poden sobrevivir. Atópase en China, Xapón, Siberia, Europa e América do Norte. En 1921 o botánico Antonio Casares documentou os primeiros exemplares en Galicia na comarca de Lemos. Daquela tan só se tiña constancia da súa presenza nunha quincena de lugares en toda a Península Ibérica.

        En 2020 atopei esta especie nunha mina de auga do Monte Mirallo. En 2022 foi documentado en Beade, no veciño concello de Vigo.

Drosera rotundifolia.

        Tamén coñecida como "Rocío do sol" ou "Orballiña”. É unha pequena planta carnívora. As súas follas de cores vivas e vistosas chaman a atención dos insectos. Cando estes se posan quedan pegados e a planta aliméntase deles. Difícil de atopar, localizouse nas brañas do río Fondón. 

 

Drosera rotundifolia. Foto: A Citania S. L.

Prunus lusitánicus.

        En 2020 a Asociación de Veciños de Chapela notificou ao Departamento de Medioambente do Concello de Redondela o achado nas ribeiras do Pugariño da especie Prunus lusitánicus polo naturalista D. Afonso Salvador Rodríguez González. Este o publicou na páxina web "Biodiversidade Ameazada", na que participa a USC, a Universidade de Porto e a Xunta de Galicia, entre outras institucións. Podedes ver a publicación no seguinte enlace:

http://biodiversidade.eu/avistamento/prunus-lusitanica-l-/

        A presenza desta especie é moi escasa en puntos moi distantes do continente europeo,estando localizado en varios puntos de Galicia.

        O citado naturalista atopou na mesma zona outras especies de interese como: Sanicula europaea e Sucissa pinnatifida. Todo isto fai do Pugariño un lugar de interese porque apesares da presión urbanística conserva unha carballeira onde medran estas e outras plantas.

 

Prunus lusitánicus no Pugariño. Foto: J. Migueles

Autor: Juan Migueles

BIBLIOGRAFÍA

Visitas guiadas polo arqueólogo Xurxo Constela de A Citania S. L.

Visitas guiadas polo promotor da recuperación dos ríos de Chapela, Álvaro Diego.

Asociación de Veciños de Chapela.

El Correo Gallego.

Wikipedia.

 

Asociación de Veciños de Chapela.

El Correo Gallego.

Wikipedia.