Praias

         

          As praias do concello de Redondela son praias de augas tranquilas por atoparse ao fondo da Ría de Vigo na chamada Enseada de San Simón.

Praia de Cesantes (Cesantes)

É a praia máis grande con 2.400 metros de lonxitude. Distínguense varias zonas: Praia Vella, Praia Nova, A Mariña, Os Estaleiros e A Punta (ou Praia do Cabo). A mellor zona para o baño é o areal da Punta que nos derradeiros anos recibiu a bandeira azul. Conta con múltiples servizos como paseo, servizos públicos, duchas, acceso para discapacitados, mesas e parque infantil. Tamén destaca pola proximidade da Illa de San Simón.

Praia da Punta. Fotos: J. Migueles, 2009

Praia de Arealonga (Chapela)

         Esta praia está delimitada por dous regatos o Rego Pugariño (ou da Bouza) e o Rego Espiñedo (Maceiras ou Segade) que marca o límite entre Chapela e Teis (Vigo). Tamén conta cun paseo con duchas, acceso para discapacitados e parque infantil.

Praia de Arealonga. Foto: J. Migueles, 2009

Praia de Cabanas (Cabanas-Trasmañó)

          Pequena cala que desaparece coa preamar. As obras da ampliación da ponte de Rande propiciaron a construción dun paso elevado rematado no 2018, que evita ter que cruzar a vía do tren por un paso sen barreira. Nela desemboca o Rego das Cabras.

Praia de Cabanas. Foto: J. Migueles, 2009

Praia de Rande (Rande-Cedeira)

         Pequena cala na que desemboca o Río Maior. Como a anterior desaparece coa preamar. Moi preto se situou o Museo Meirande.

Praia de Rande. Foto: J. Migueles, 2009.

Praia de Fontán (Cesantes)

         Para situala podemos tomar por referencia o Viaduto de Fontán da liña do ferrocarril.

Praia de Soutoxuste (O Viso)

         Outra pequena cala que coma as anteriores desaparece coa preamar.

 Autor: J. Migueles