Historias de caza

Ramón Carrera coa loba cazada en Negros. El Pueblo Gallego

 

O 27 de xaneiro de 1877 ás oito da noite, o mineiro Santiago Ubiña dirixíase a traballar na construción do túnel dos Valos cando o sorprenderon dúas luces diante súa. Pensou que se trataba dos candís dos seus compañeiros polo que seguiu avanzando ata que se decatou de que eran os ollos dun lobo. Tentou escapar pero a besta adiantábase aos seus movementos polo que decidiu enfrontarse a el. Co candil que levaba golpeou ao lobo que torceu a cabeza, aproveitando para cravarlle unha navalla. O animal ferido arremeteu contra Ubiña, que se defendía a golpes e navalladas. Os traballadores correron alarmados polos os gritos de auxilio, mais cando chegaron o lobo estaba morto e Santiago Ubiña ileso aínda que moi afectado.

En decembro de 1891, acosado por uns afeccionados á caza un xabarín refuxiouse na horta de Luciano Fernández. O notario Antonio Ferreras atinoulle cunha bala que lle esnaquizou a parte superior da boca. O xabarín fuxiu pola vía férrea sen que lle alcanzasen os disparos de Santos Lago e Eduardo Sánchez. Esgotado polo sangue perdido foi finalmente alcanzado en Trasmañó por uns labregos que o mataron a paus. Apesares de que os de Trasmañó pretendían quedarse co animal, os cazadores conseguiron facer prevalecer os seus dereitos traéndoo a Redondela, onde se repartiron a carne. Pesaba nove arrobas. Crese que este e outros xabaríns chegaron aos montes de Redondela fuxindo dunha batida que fixeron en Ponteareas.

En agosto de 1898 os xabaríns convertéranse nun problema, provocando desfeitas nos campos de millo de Cabeiro, Os Valos, Nespereira e Cepeda.

En marzo de 1900, os de xabaríns causaban desfeitas en Saxamonde polo que se formou unha partida de caza. Conseguiuse matar a un destes animais duns 60 quilos de peso preto do Mendo, entre Quintela e Louredo (Mos). Probablemente viña fuxindo daqueles montes o xabarín que poucos días despois, paseou polas rúas de Redondela causando o pánico dos veciños e internándose logo nun bosque próximo ao viaduto de Pontevedra. Saíron tras el varios cazadores sendo abatido polo señor Álvarez dun certeiro disparo. Pesaba uns 75 quilos.

En decembro de 1907 cinco cazadores que estiveron tres días no Suído (Fornelos) cobraron 83 perdices. Un deles, que ía cos de Redondela, Manuel González Fresco, de Vigo, de 65 tiros matou 62.

En decembro de 1908, en Reboreda, Narciso Míguez ao disparar cunha escopeta a un can, feriu ao seu compañeiro, Sabino Otero.

En abril de 1914 foi abatido en Padróns (Saxamonde) un xabarín que causara varios danos e que pesaba uns 70 quilos.

O párroco de Quintela Alfonso Álvarez Gil, matou en xullo de 1916 un xabarín que pesou unhas nove arrobas.

A finais de 1930, os paxaros chamados vulgarmente bicotorto común e en linguaxe técnico Loxia Curvirostra, provocaban moitas desfeitas nas árbores, polo que a Comisión provincial acordou pagar 25 céntimos por cabeza de ave. A sorpresa veu cando, o 8 de xaneiro, presentouse na deputación José Martínez, veciño de Redondela, con cen cabezas do citado paxaro.

En novembro de 1935, José Escudero, veciño de Trasmañó, sufriu unha ferida de prognóstico reservado con perda de tres dedos da man dereita. Produciuse a ferida ao disparárselle a escopeta de caza cando tiña apoiada a man no canón.

Ante os numerosos danos causados polos xabaríns, en agosto de 1938, organizouse unha batida nos límites entre Mos e Redondela. Despois de localizar unha manada, esta foi rodeada e plantouse lume na maleza. Os xabaríns saíron con tanta forza que derrubaron a varios cazadores causando a fuxida dos veciños.

A finais de 1954 unha disposición gobernamental dispón que se considere zona reservada para a caza os montes da parroquia de Cedeira. A Sociedad La Viguesa de Caza y Pesca, á que pertencían a maioría dos aficionados locais, realizaron unha solta de perdices por montes de Vigo, Chapela, Trasmañó, Cabeiro e Cedeira. A especie estaba practicamente extinguida na contorna, polo que estaba vedada a súa caza para tentar a súa implantación.

En 1962 os lobos causaron grandes prexuízos en Negros e Cedeira matando a trinta ovellas e multitude de galiñas. Esta situación levou a organización de servizos de vixilancia por parte dos veciños. A paciencia deu os seus froitos e Ramón Carrera Rodríguez, veciño de Negros, abateu unha loba de 47 quilos.

Recentemente, o 30 de novembro de 2017, seis xabaríns chegaron ao casco urbano de Redondela. Asustados ao ser perseguidos por un grupo de curiosos, saltaron dende o adro da igrexa á rúa Figueiral. Por mor da gran altura que existe un deles faleceu.

Autor: Juan Migueles

BIBLIOGRAFÍA

Galiciana- http://www.galiciana.bibliotecadegalicia.xunta.es => El pueblo gallego, El Diario de Santiago, Gaceta de Galicia Diario de Santiago, El Diario de Pontevedra, La idea moderna, El Correo de Galicia