Os antigos cemiterios

Cemiterio dos Eidos

Construído en 1833, ademais dun encanto arquitectónico, este cemiterio ten un gran interese histórico xa que nel descansan os restos da meirande parte das personaxes relevantes da historia desta vila. O 1 de xaneiro de 1973 estableceuse como data de entrada en funcionamento do novo cemiterio de Mañó, en Quintela, pero a súa inauguración non tería lugar ata dez anos despois. O cemiterio dos Eidos sería clausurado por resolución da alcaldía do 25-11-1988. No 2020 iníciase a restauración do cemiterio.

Cemiterio dos Eidos Fotos: J. Migueles, 2009.

¿Como chegar?

         A entrada ao cemiterio atópase na rúa Campo das Redes no casco urbano de Redondela.

Estado actual (2008)

         O mantemento do cemiterio é mínimo. Non estaría mal a limpeza da pedra de algúns panteóns e o empedrado do chan que segue a ser de terra. Outra opción, levada á práctica noutras vilas, sería o traslado das tumbas menos interesantes, historicamente falando, e converter o recinto nun parque temático no que poder contemplar a arquitectura fúnebre e dar a coñecer a historia da vila.

Cemiterio dos Eidos. Foto: J. Migueles, 2010

Cemiterio Evanxelista de Trasmañó

         Para os amantes dos sitios cun encanto de morte, é unha visita obrigada este vello cemiterio de Trasmañó. A principios do século XX en Trasmañó edificouse este cemiterio e unha igrexa evanxélica, hoxe tamén en ruínas. Trátase dun pequeno cemiterio no que os restos foron exhumados e trasladados. No centro do recinto aínda se pode observar unha mesa de pedra a modo de altar para rezarlle as derradeiras oracións ao finado. Tamén podemos observar os restos de varias lápidas, unha delas sobre unha especie de sartego de pedra, e o relevo do chan indícanos os lugares onde se atopaban as tumbas escavadas. Absterse toda persoa que teña prexuízos con este tipo de lugares, xa que resulta bastante tétrico.

Cemiterio Evanxelista de Trasmañó. Foto: J. Migueles, 2009.

¿Como chegar?

          Saíndo de Redondela, dirixirémonos cara a Chapela. Ao chegar ao Alto da Encarnación viraremos cara á parroquia de Trasmañó. Ascendemos pola estrada e a uns 200 metros antes do Centro Cultural de Trasmañó do lado dereito, un corto camiño de terra condúcenos ao cemiterio, que xa se ve dende a estrada.

Estado actual (abril 2009)

          O lugar está totalmente abandonado e non se libra dos botellóns (hai xente para todo). Sería interesante un estudio en profundidade da súa historia. Se non se vai a desmantelar totalmente para adicar os terreos a outra cousa, un panel informativo e un mínimo de limpeza serían suficientes para que o lugar fora visitado (este tipo de lugares non son do gusto de todos pero teñen o seu atractivo).

 Cemiterio Evanxelista de Trasmañó.

Fotos: J. Migueles, 2009

Autor: Juan Migueles

BIBLIOGRAFÍA

SEREN

Nº3. Os Eidos: “A vila dos mortos”. J. A. Orge Quinteiro.

En Galiciana-Biblioteca Digital de Galicia. Xunta de Galicia: http://www.galiciana.bibliotecadegalicia.xunta.es=> El Pueblo Gallego