Relixión e crenzas: "As Capillas"

Capilla. Foto: J. Migueles

 

Seguramente todos saibades o que son os petos das ánimas, pero os máis novos descoñeceredes o que eran as capillas. Basicamente eran petos para recadar fondos para dar unha misa, organizar unha procesión ou calquera outro acto relixioso na honra dun santo. Estaban feitos de madeira e medían aproximadamente 40 centímetros de alto. Contiñan unha imaxe do santo protexido por un cristal e, na maioría dos casos, por unhas contras. Estas capillas íanse pasando de casa en casa, permanecendo 24 horas en cada unha. Podían ser da Virxe do Carme, das Ánimas, do Corazón de Jesús... Na vila chegaron a circular 14 das Angustias. Caso especial era o mercado de abastos, no que había varias capillas e, cada día, pasábase unha diferente por tódolos postos para que as peixeiras e as súas clientas aportaran o que puideran. Tamén os mariñeiros ao facer o reparto das ganancias, se sobraba algo, facían a súa contribución.

         Os nenos, pola súa banda, aproveitaban o día de San Xoán para facer as súas propias capillas. Xuntaban uns caixóns, apañaban a imaxe dun santo da casa e adornaban o conxunto con flores. Feito isto, uns pedían diante do improvisado altar, mentres outros collían un prato de café e ían polas rúas pedindo por exemplo: “Para a capilla de san Xoán que está na curva de Santa Mariña”. Logo reuníanse e repartían os cartos, eran os tempos das chicas (5 céntimos), os patacos (10 c.) e os rás ou reais (25 c.), pero destes últimos vianse menos.

Autor: Juan Migueles

BIBLIOGRAFÍA

Libros de poemas de Félix Fernández:

• Poemas.
• Poemas de una vida.
• Historias do meu pobo.

Aportes orais.