Crónica Negra (1951-1979)

1959 Incendio casa no Coto. Foto: Siorty-El Pueblo Gallego

1955, 21 de maio. Para proceder á realización duns análises, o farmacéutico e químico Luis Pereira Otero trasladouse á Fábrica de aceites da estrada da Portela, acompañado do seu fillo de 4 anos. Nun descoido o neno caeu nun pozo onde se acumulan aceites. Apesares de socorrelo axiña non puido facerse nada por salvarlle a vida.

1955, 14 de xuño. A veciña de Trasmañó, Perfecta Rodríguez Álvarez, foi golpeada cunha botella. Na Casa de Socorro de Vigo aprecióuselle unha ferida de sete centímetros na rexión temporal con probable corte da arteria temporal. O seu estado foi considerado grave e trasladada ao hospital do Cristo da Victoria de onde nos informan que non se teme pola súa vida.

 

1955, 8 de xullo. O neno de Cesantes, Bernardo Crespo Fontán, de sete anos de idade, trasladárase ao pobo de Redondela para visitar a uns parentes e ao regresar aproveitou a oportunidade dun camión que ía a pasar por Cesantes e montouse nel sen ser visto por ninguén. Ao chegar o camión a Cesantes o neno tirouse do mesmo en marcha, sen que o condutor nin ningún dos ocupantes o advertiran e o caer quedou morto no acto na estrada. Un automóbil que pasou pouco despois polo lugar do suceso descubriu o cadáver e deu conta ás autoridades do feito.

1957, 12 de marzo. Apesares de ser atendido no Sanatorio Almirante Viena, faleceu o empregado de ferrocarril, Leopoldo Pena Olea, domiciliado en San Xoán do Monte, que sufriu unha caída coa súa moto en Chapela. Ía acompañado da súa filla de corta idade que se salvou milagrosamente.

1957, 12 de marzo. Cando saía dunha consulta médica e se dirixía a casa duns familiares que viven nas Travesas, faleceu a veciña de Redondela, Carmen Rodríguez Magariños, de 66 anos. Suponse que faleceu por unha afección cardíaca da que estaba a tratarse e apesares de ser conducida á Casa de Socorro, tan só se puido certificar á súa morte.

1958, 16 de outubro. En Saxamonde foi atropelado o neno de 13 anos, Manuel Lago Álvarez. As feridas eran tan graves que faleceu ás poucas horas. O coche pertencía á universidade de Heidalberg e era conducido por Helmnt Ernst Georg Grasslim, avogado de 25 anos, natural de Mappheim (Alemania Oriental).

1959, 18 de xuño. Na parroquia de Cabeiro, cando traballaban varias mulleres nun campo de millo, produciuse unha forte tormenta. A caída dun raio matou a María Méndez Taibo e feriu á súa cuñada Dolores Bastos Taibo nun brazo e unha perna.

1959, 2 de xullo. Un incendio destrúe unha casa no Coto (Cesantes) alugada ao mariñeiro Raúl Campos. No incendio iniciouse cando o matrimonio non estaba na vivenda, falecendo unha filla de nove anos. Carmiña Campos lograría sacar a súa irmá de sete anos, pero as dúas resultaron con queimaduras de consideración. Por desgraza a pequena tamén falecería ao día seguinte

1962, 28 de setembro. Na Concheira (Rande) chocaron un taxi de Pontevedra e un turismo de Vigo. No accidente perdeu a vida o taxista e resultaron feridas sete persoas, tres delas nenas menores de idade.

 

1962 Dous dos accidentados na Cuncheira. Foto: Siorty- El Pueblo Gallego

1965, 9 de xullo. Perfecto Castro González, de 60 anos, casado e domiciliado en Chapela, caeu onte do segundo andar dun edificio en construción en Chapela. Trasladado á residencia Almirante Vierna, ingresou cadáver.

1965, 29 de decembro. O veciño de Redondela, Víctor López Carrera, conducía unha moto pola Travesía de Vigo (Chapela) cando ao cruzarse cun camión desviouse atropelando a José Bastilleiro Rodríguez, de 61 anos e veciño de Caldas de Reis, que faleceu, e a Manuel González Duarte, que resultou ferido.

1966, 17 de setembro. Cando estaba xogando preto da casa dos seus pais en Redondela, o neno José Figuero Rivas, de 9 anos, caeu a un pozo sen que ninguén o vira, perecendo afogado.

1966, 15 de novembro. Catro falecidos ao caer ao mar un taxi no peirao de Guixar. Os pasaxeiros eran empregados de Butano S. A. que se dirixían a realizar un transvase de gas dende un buque aos depósitos que a empresa posúe en Guixar. Un deles era Rafael Gómez Jorge, natural de Vigo e veciño de Riofrío (Chapela).

1966 Coche accidentado en Guixar. Foto: Arjones-El Pueblo Gallego

1969, 05 agosto. Na Residencia Sanitaria «Almirante Vierna» .faleceu José Campos Balado, a consecuencia das feridas que sofreu o día 31 ao disparárselle unha escopeta cando a limpaba no seu domicilio de Reboreda.

1969, 12 de decembro. No lugar de Millarada, no punto chamado “Regato da Poza”, atopouse o cadáver do veciño daquel lugar, Francisco Vilaboa Grana, de 43 anos de idade. Suponse que se trata dun accidente casual, porque semella que padecía ataques epilépticos.

1973, 7 de abril. Foi atropelada por un camión en Redondela Laura Paz Millán, veciña de Pontesampaio de 63 anos, quen faleceu horas despois.

1974, 21 de novembro. Manuela Martínez Veiga, de 71 anos, foi atropelada por un automóbil cando tentaba cruzar a rúa en Redondela. A anciá resultou con graves feridas que ocasionaron a súa morte.

1975, 2 de xuño. Fernando Tiago Suárez, de 67 años, veciño de Mos, e Paulino García Alvarez, de 44 anos, domiciliado en Redondela, foron atropelados nesta última vila por un turismo conducido por un veciño de Pontevedra. Os dous homes invadiran a calzada mentres descargaban unha furgoneta. Fernando Tiago faleceu e o seu compañeiro resultou ferido grave.

1975, 26 de xuño. José Otero Amoedo, de 22 anos, que levaba 14 meses de servizo militar e tiña previsto licenciarse o 14 de xullo, faleceu no deserto do Sahara en acto de servizo ao pisar o Land-Rover no que viaxaba unha mina anti-carros. Os seus restos mortais serían trasladados dous días despois ao domicilio familiar en Eirapedriña (Cedeira), onde viven os seus pais e outros cinco fillos do matrimonio.

1975, 6 de novembro. Francisco Quinteiro García, de 66 anos, ao tratar de cruzar a calzada en Redondela, foi alcanzado por un automóbil, que lle produciu graves feridas como consecuencia das cales faleceu.

1976, 19 de agosto. Cando se bañaba no río Verdugo cuns amigos, desapareceu baixo as augas o mozo Domingo Otero Pereira, de 16 años, veciño de Cesantes. O seu corpo sería rescatado polo persoal da Axudantía de Mariña, do fondo do río onde quedara aprisionado.

1979, 10 de febreiro. Ingresou cadáver na residencia Almirante Vierna, Enrique García Barral, de 68 anos, que vivía na rúa General Mola (actual José Regojo), de Redondela. Faleceu ao ser atropelado por un coche cando cruzaba a Plaza de Santa Rita en Vigo.

1979, 15 de decembro. Unha muller resultou morta en atropelo, en Redondela. Trátase de Adoración Ponche García, de 44 anos, casada, á que alcanzou o automóbil PO-57.733, conducido por Leocadio Domínguez Estévez.

Autor: Juan Migueles

BIBLIOGRAFÍA

Arredor de nós. Historia da Policía Local 1863-2003. Gonzalo Amoedo López e Roberto Gil Moure. 2003.

En Galiciana-Biblioteca Digital de Galicia. Xunta de Galicia: http://www.galiciana.bibliotecadegalicia.xunta.es => Gaceta de Galicia, El Diario de Pontevedra, La Integridad, El Progreso, El Regional, El Lucense, La Correspondencia Gallega, El Pueblo Gallego, Correo de Galicia...

www.boe.es => Gaceta Oficial de Madrid

www.consellodacultura.gal => Eco de Galicia (A Habana)

No Ministerio de Cultura http://prensahistorica.mcu.es => El Correo Salmantino, La Correspondencia de España, El Lábaro (Salamanca)...

Na Biblioteca Nacional de España: www.bne.es => El Globo (Madrid), El Liberal, El Día (Madrid), El Correo Español, El regional

La Voz de Galicia => http://www.lavozdegalicia.es/hemeroteca/

Faro de Vigo => Hemeroteca.