En 1926 o Concello
decidiu exercer controis sobre a calidade e os prezos do leite que se
vende na nosa vila. Como resultado destes controis en setembro foron
multadas por adulterar o leite Peregrina González Vidal, veciña de
Cesantes, e Filomena Sotelino Barral, de O Viso. A media é ben
recibida pero os cidadáns demandan o mesmo control sobre a venda de
carne e pan, polas moitas irregularidades que se cometían.
As
autoridades deberon tomar nota porque en decembro dese ano a Xunta
Provincial de Subsistencia multou en Redondela: Con 100 pesetas a
Vicente Comesaña, concelleiro de Redondela, por comprobarse a falta
de 100 gramos en todas as pezas de pan que se expedían no seu
establecemento. Con 100 a Bernardo García, por falta de peso na
carne e ademais
cobrala a un prezo
superior que o da taxa.
Con 100 a Marcelina Queimaliños, polo mesmo que o anterior. Con 75 a
Laureano Lago, por faltarlle 100 gramos en 1Kg., e 50g. en medio
quilo no pan que
expendía no seu establecemento. Con 75 a Dolores López, polo mesmo
que o anterior. Con 50 a Emilio M. Bragado, por atoparse no seu
establecemento de comestibles unha pesa de 2 kg. Á que lle faltaban
50 gramos, outra de 1 kg. con 40 gramos e outra de medio quilo
con 20 gramos menos. E con 50 a Luisa Conde, por vender carne de vaca
a maior prezo que
o da taxa,
atopando ademais
o seu establecemento pouco hixiénico e cheo de morriña.
Este tipo de enganos e outros
semellantes formaban parte dunha práctica xeneralizada en toda
Galicia, polo que as sancións similares ás anteriores non se
limitaban ao noso concello. Nos anos seguintes a situación non
melloraría demasiado e continúan as multas e as peticións de
maiores controis no leite, pan e carne. Como exemplo, dicir que dous
anos despois, en Redondela, algúns carniceiros negábanse a vender
carne para encarecer o produto, vendíase a maior prezo que o marcado
pola xunta provincial de Abastos, as faltas de peso eran constantes
e, o máis grave, un informe do veterinario municipal denunciaba
varios casos de venda de carne en mal estado.
Ante a gravidade
da situación a xunta provincial de Abastos endureceu as multas. Con
500 pesetas foron sancionados os carniceiros de Redondela: Bernardo
García Figueroa, Elisa Conde Farto e Marcelina Queimaliños, por
negarse a vender carne ao público, cobrala a maior prezo do da taxa
e con falta de peso e tratar aos clientes con gran desconsideración.
Tamén se comeza a
exercer un maior control sobre os fabricantes de conservas e, en
Redondela, múltase con 25 pesetas a Enrique Avendaño Estela e
Manuel Pérez Rodríguez, por negarse a facilitar datos ao Concello
relacionados coa súa produción.
Autor: Juan Migueles
BIBLIOGRAFÍA
Galiciana-
http://www.galiciana.bibliotecadegalicia.xunta.es
=> El pueblo gallego, El
Diario de Pontevedra
